Azərbaycan millisi Rusiya ilə yoldaşlıq oyunları keçirəcək

Azərbaycanın qadın futbolçulardan ibarət yığması 2024-cü ilin sonunda Rusiya millisi ilə iki yoldaşlıq oyunu keçirəcək.

Komanda.az xəbər verir ki, bu barədə Rusiya Futbol Birliyinin mətbuat xidməti məlumat yayıb.

Rusiyanın qadınlardan ibarət yığması noyabrın 24-dən dekabrın 3-nə qədər Soçidə təlim-məşq toplanışı keçəcək. Azərbaycan millisi ilə oyunlar da toplanış zamanı baş tutacaq.

Görüşlər noyabrın 28-də “Fişt” stadionunda və dekabrın 2-də “Soçi” klubunun məşq bazasında qapalı rejimdə keçiriləcək. Oyunlar saat 18:00-da başlayacaq.

Rusiya və Azərbaycanın qadınlardan ibarət milliləri daha əvvəl iki dəfə münasibətləri aydınlaşdırıblar. 2021-ci ilin sentyabrında Azərbaycan yığması dünya çempionatının seçmə mərhələsində Moskvada rəqibinə 0:2 hesabı ilə məğlub olub. Həmin ilin noyabrında Bakıda baş tutan qarşılaşma da Rusiya yığmasının qələbəsi ilə yekunlaşıb – 4:0.