“Onun istedadına inanıram, o, hər kəsin yanıldığını sübut etməlidir” – Rivaldo

“Barselona”nın və Braziliya millisinin sabiq futbolçusu Rivaldo icarə əsasında “Bavariya”da çıxış edən Filippe Koutinyo ilə bağlı açıqlama verib.

Komanda.az xarici mətbuata istinadən xəbər verir ki, keçmiş futbolçu, mövsümün sonunda icarədən “Barselona”ya qayıdacağı gözlənilən Koutinyonun karyerası ilə bağlı bunları deyib:

“Görünən budur ki, mövsümün sonunda “Bavariya” Koutinyonu birdəfəlik transfer etməyəcək və o, “Barselona”ya qayıdacaq. Koutinyonun İspaniya çempionatına Almaniyadan daha yaxşı uyğunlaşdığını düşünürəm, çünki Almaniyada braziliyalı futbolçular üçün çətin ola biləcək dil və həyat tərzi ilə bağlı məqamlar var.

Bundan sonra “Barselona” rəhbərliyi və məşqçiləri Koutinyoya şans verib-verməmələri ilə bağlı qərar verməlidirlər. Şans verilsə, Koutinyo öz üzərində çalışmalı və nə qədər böyük futbolçu olduğunu göstərməlidir. Onun istedadına inanıram, o, hər kəsin yanıldığını sübut etməlidir. Bəlkə də, Bundesliqa təcrübəsi Filippeni oyandırıb və “Barselona”nın onun üçün nə qədər doğru yer olduğunu görüb”.

“Barselona”nın “Çelsi”nin hədəfində olan futbolçunu satışa çıxarması gözlənilir.