“Lion”la oyun çox maraqlı olacaq” – “Qarabağ”ın futbolçusu

“Qarabağ”ın futbolçusu Yassin Benzia UEFA Avropa Liqasının 5-ci turunda Bakıda “Lion”la (Fransa) oyundan əvvəl keçirilən mətbuat konfransında iştirak edib.

Komanda.az xəbər verir ki, əlcəzairli yarımmüdafiəçi oyunun onun üçün xüsusi əhəmiyyət daşıdığını deyib:

“Lion”la oyun çox maraqlı olacaq. Rəqib komandada çox böyük fərq var. Mən oynadığım zamanda da yaxşı performans göstərirdilər. İndi də yüksək səviyyəli komandaları var.

“Qarabağ” adının özü xüsusi konteksdə olduğuna görə, mən deyərdim ki, onun formasını geyinmək, bu komandanın şərəfini qorumaq mənim üçün qürurdur. Bizim baş məşqçimiz çox güclü şəxsiyyətdir. O, bizə “Qarabağ” adının mahiyyətini başa salıb. Bu komandanın təmsil etdiyi bölgə uzun müddət müharibə şəraitində qalıb. Ona görə dedim ki, bu ad bizim üçün xüsusidir.

Burada bir ailə olaraq fəaliyyət göstəririk. Həmçinin digər ailəyə bənzər dəyərlər də var. Özümü burada çox yaxşı hiss edirəm”.

Benzia 2011-2015-ci illər aralığında “Lion”da çıxış edib.

Noyabrın 28-də Tofiq Bəhramov adına Respublika Stadionunda keçiriləcək “Qarabağ” – “Lion” matçı saat 21:45-də start götürəcək.

Fəxri Rüstəmli