“Bu qarşılaşmanı final matçı kimi oynamalıyıq” – Valverde

Çempionlar Liqasının yarımfinal mərhələsinin cavab oyunları çərçivəsində səfərdə “Liverpul”un qonağı olacaq “Barselona”nın baş məşqçisi Ernesto Valverde açıqlama verib.

Komanda.az İspaniya mətbuatına istinadən xəbər verir ki, 55 yaşlı mütəxəssis, ilk oyunda 3:0 hesabı ilə qalib gəlmələrinə baxmayaraq, cavab görüşünün daha çətin keçəcəyini deyib:

“İlk oyundakı nəticəyə baxmayaraq, diqqətli olmalıyıq. Bir həftə əvvəlki oyunu düşünsək, böyük səhv edərik. Bu qarşılaşmanı final matçı kimi oynamalıyıq. Bizim üçün çətin olacaq, çünki “Liverpul”un gücünü bilirik. Bütün gücümüzü meydanda qoymalıyıq. “Liverpul” qələbə qazana bilər, onlar bu mövsüm Premyer Liqada sadəcə bir oyunda məğlub oldular. Bizim üçün rahat bir oyun olmayacaq.

“Barselona” – PSJ qarşılaşmalarında PSJ-yə cavab matçında bir qolun kifayət edəcəyini düşünürdülər. Buna baxmayaraq, “Barselona” 6 qol vurdu. Buna görə də, diqqətli olmalıyıq”.

“Liverpul” – “Barselona” matçı bu gün, saat 23:00-da start götürəcək.