Tanınmış jurnalist vəfat etdi

AFFA-nın mətbuat xidmətinin keçmiş rəhbəri, “Səhər” qəzetinin baş redaktoru olmuş veteran jurnalist Məzahir Süleymanzadə vəfat edib.

Komanda.az xəbər verir ki, bu barədə onun qardaşı Tahir Süleymanov məlumat yayıb.

Məzahir Süleymanzadə 1952-ci il dekabrın 22-də Bakıda anadan olub. 1970-ci ildə Şamaxı şəhərindəki 1 saylı orta məktəbi bitirib. Ötən əsrin 70-ci illərinin əvvələrində Şamaxı Tarix-Diyarşünaslıq Muzeyinə rəhbərlik etmiş jurnalist Zaqafqaziya Hərbi Dairəsinin Tbilisidəki Ali Hərbi Müxbirlər məktəbini, Lvov Ali Hərbi-Siyasi Məktəbinin jurnalistika fakultəsini bitirib. 1974 – 1979-cu illərdə Bakı Dövlət Universitetinin jurnalistika fakültəsində təhsil alıb.

Müxtəlif illərdə “Leninskoe znamya”, “Krasnaya zvezda”, “İdman Sport” qəzetlərində, “Sovetskiy voin” jurnalında çalışıb. “Kommunist” qəzetində baş müxbir, məsul katib və redaktor müavini vəzifələrini tutub. 1989-cu ildə müstəqil Azərbaycan mətbuatının ilkləriindən sayılan “Səhər” qəzetini təsis edib. Süleymanzadə həmçinin çoxsaylı kitablar müəllifidir.

1984-1994-cü illərdə “Qızıl qələm”, “Həsən bəy Zərdabi”, “Mirzə Cəlil”, həmçinin “Araz” Ali mükafatına layiq görülüb, 1989-cu ildə Azərbaycan SSR Ali Sovetinin Fəxri Fərmanı ilə təltif olunub. Mərhum jurnalist 2005-ci ildə Azərbaycan Respublikası Prezidentinin fərmanı ilə “Əməkdar mədəniyyət işçisi” fəxri adına layiq görülüb.

Süleymanzadə futbol sahəsində də fəaliyyət göstərib. O, “Neftçi” və AFFA-da mətbuat katibi, Bakı Futbol Federasiyasında prezident və vitse-prezident vəzifələrində çalışıb.

Bizi Telegramda izləyin

Bizi Facebook-da izləyin

Əlaqəli yazılar

Back to top button