Fiqu: “Real”da baş verənlər anormaldır”

“Real”ın keçmiş yarımmüdafiəçisi Luiş Fiqu komanda daxilindəki vəziyyət barədə danışıb.

Dünən Federiko Valverde ilə Orelyen Tçuameninin məşq zamanı toqquşduğu və nəticədə, Valverdenin başına tikiş atılmaq üçün xəstəxanaya göndərildiyi bildirilib. Komanda yoldaşları əvvəlki gündən bəri mübahisə ediblər. Klub davadan dərhal sonra təcili iclas keçirib.

Komanda.az xarici KİV-ə istinadən xəbər verir ki, portuqaliyalı keçmiş futbolçu, “Real”da baş verənlərin anormal olduğunu bildirib:

“Real”da baş verənlər anormaldır. Belə bir yerdə belə bir şey baş verməməlidir, baxmayaraq ki, bu, nə ilk, nə də sonuncudur. Belə vəziyyətlər paltardəyişmə otağında məyusluq anlarında yarana bilər. 30 nəfəri idarə etmək asan deyil və bəzən baş verməməli səhvlər olur”.

O, Joze Mourinyonun komandaya baş məşqçi kimi mümkün qayıdışı haqqında isə bunları deyib:

“Mənim dövrümdə o, mənim tərcüməçim, köməkçi məşqçim, baş məşqçim və dostum idi və mən heç vaxt onun həddindən artıq ifrata vardığını hiss etməmişəm. Düzünü desəm, klubu və oradakı atmosferi bildiyim üçün “Real”ın buna ehtiyacı olduğunu düşünmürəm. Nəticə etibarilə, 25 eqonu idarə etməyi bacarmaq lazımdır. Bu günlərdə futbolu anlamaqla yanaşı, məşqçinin oyunçuları eyni istiqamətdə işləməyə inandırmaq üçün bu şəxsiyyətləri idarə etməyi bacarması da vacibdir. Bilmirəm, Florentino Peresdən (“Real”ın prezidenti) soruşun. Mourinyo mənim dostumdur və ona ən yaxşısını arzulayıram.

Son illərə baxanda, Visente Del Boske, Zinəddin Zidan və Karlo Ançelotti (“Real”ın sabiq baş məşqçiləri) “möhkəm əl” profilinə tam uyğun gəlmirlər. Düşünmürəm ki, bu model işə yarayır”.