Van Nistelroyun yeni klubunun adı rəsmən açıqlanıb

Rud van Nistelroy “Lester”in baş məşqçisi təyin edilib.

Komanda.az İngiltərə klubunun mətbuat xidmətinə istinadən xəbər verir ki, niderlandlı mütəxəssislə müqavilə 2027-ci ilin iyun ayına qədər nəzərdə tutulub.

Nistelroy ötən ay həmyerlisi Erik ten Haq baş məşqçi postunu tərk etdikdən sonra “Mançester Yunayted”ə müvəqqəti baş məşqçi təyin edilib. Komanda onun rəhbərliyi altında bütün turnirlərdə 3 qələbə qazanıb və 1 dəfə heç-heçə edib. Qələbələrdən biri Liqa kubokunda “Lester” üzərində qeydə alınıb (5:2).

Van Nistelroy noyabrın 11-də “Mançester Yunayted”in məşqçilər heyətini tərk edib və Ruben Amorim komandanın baş məşqçisi olub.

48 yaşlı mütəxəssis əvvəllər Niderlandın PSV komandasına rəhbərlik edib, ölkə kubokunu və superkuboku qazanıb. O, futbolçu kimi 2001-2006-cı illərdə “Mançester Yunayted”də çıxış edib və İngiltərə çempionu olub. Van Nistelroy İspaniyanın “Real”, “Malaqa” və Almaniyanın “Hamburq” klublarında da çıxış edib.

“Lester” 12 oyundan sonra 10 xalla İngiltərə çempionatının turnir cədvəlində 16-cı pillədə qərarlaşıb.