Elvin Məmmədov – 50!

Azərbaycan Premyer Liqasının 9-cu turu “Zirə”nin futbolçusu Elvin Məmmədov üçün əlamətdar olub.

Komanda.az klubun rəsmi səhifəsinə istinadən xəbər verir ki, “Sabah”la səfər matçına kapitan kimi çıxan yarımmüdafiəçi, “qartallar”ın heyətində yubiley – 50-ci oyununu keçirib. O, bu müddətdə 5 qola imza atıb.

Elvin Premyer Liqada 47, Azərbaycan kubokunda 3 dəfə “Zirə” forması ilə meydana çıxıb. 2016-cı il yanvarın 31-də çempionatın “Keşlə” ilə ev oyununda (2:1) debüt edən Məmmədov, 2015/16 mövsümündə 15 görüşdə (2 qol) iştirak edib. Yarımmüdafiəçi 2016/17 mövsümündə 24 çempionat (3 qol) və 3 kubok görüşündə şans qazanıb. 2 illik fasilədən sonra bu yay “Zirə”yə qayıdan futbolçu cari mövsüm Premyer Liqada 8 dəfə meydana çıxıb.

Elvin komandanın heyətində 50 və daha çox oyun keçirən 14-cü futbolçu olub.