“Sizi niyə mənim maaş alıb-almamağım maraqlandırır?” – Müsahibə

“Kəpəz” klubunun baş məşqçisi Yaşar Vahabzadənin Komanda.az saytına müsahibəsi.

– Yaşar bəy, son turda komandanız “Turan Tovuz”a məğlub oldu. Bu məğlubiyyət haqqında nə deyə bilərsiz?

– Mən deməzdim ki, “Turan Tovuz” komandasından pis oynadıq. Əksinə, ərazi üstünlüyü bizdə idi, qol epizodlarını da biz yaratdıq. Lakin yaratdığımız qol epizodlarından istifadə edə bilmədik. Rəqib komanda isə əlinə düşən imkanlardan istifadə edib, qələbə qazandı. Oyun epizodlarında top iki dəfə qapı dirəyindən qayıtdı və iki-üç yüz faizlik qol epizodunu dəyərləndirə bilmədik.

– Oyun zamanı sizə ünvanlanan plakatda yazılanlar (“Turan Tovuz” – “Kəpəz” oyununda azarkeşlər “Nəticələriniz gözümüzü YAŞARdır” yazılı plakat açıb) sosial mediada xeyli maraq doğurdu. Siz bu haqda nə düşünürsüz?

– Bu plakat haqqında heç nə düşünmürəm. Yazı yazıb, şüarlar səsləndirmək azarkeşlərin haqqıdır. Biz işimizə davam edirik. Çempionatın sonuna beş tur qalıb. Azarkeşləri başa düşürəm, qələbə istəyirlər. Mən də çalışıram ki, komandanı qələbəyə kökləyim. Həm psixoloji, həm də fiziki cəhətdən.

– Bu plakata qarşılıq olaraq azarkeşlərə nə demək istərdiz?

– Heç nə.

– Gələn mövsümdən “Kəpəz”in Premyer Liqaya qayıdacağı ilə bağlı məlumatlar var. Sizcə, komandanız Premyer Liqaya çıxmağa hazırdır?

– Bu məsələ tam təsdiqlənməyib. Təsdiqləndikdən sonra bu barədə danışmaq olar. Hər halda, birinci divizion komandalarında Premyer Liqada oynamaq üçün səviyyəli oyunçular olmalıdır. Fərqi yoxdur, istər “Kəpəz”, istərsə də digər klublar olsun. Yeni futbolçular lazımdır.

– Birinci divizionun turnir cədvəlində 8-ci sırada olan komanda Premyer Liqada uğur qazana bilərmi?

– Dediyim kimi, hansı divizion klubu olursa olsun, dəyişiklik lazmdır. Yeni oyunçular cəlb olunmalıdır ki, komanda güclənsin, nəticə versin.

– Komandanızın ən ödənişli futbolçusu Cavid İmamverdiyevin tezliklə fərdi məşqlərə başlayacağını demişdiz. Lakin hazırda oynamır, səbəb nədir?

– Oyunçunun yüksək və ya az ödənişli olduğunu heç kim bilə-bilməz. Kimsə özündən fərziyyə uydurub yazıb ki, Cavid ən yüksək ödənişli oyunçudur. Yanlış fikirdir. Cavid dizindən əməliyyat olunmuşdu, artıq fərdi məşqlərə başlayıb. Hələ ki, həkimlər komandaya qoşulmasına icazə vermirlər. O, fərdi məşqlərini edir. Hərdən komandaya da qoşulur, amma tam hazır deyil.

– Bildiyimizə görə, Cavid İmamverdiyev mövsümün əvvəlində zədəli idi. Onu zədəli halda nəyə görə komandaya götürmüşdüz?

– Cavid mövsümün əvvəlində zədəli deyildi. Gəldi məşqlərə qoşuldu. Çoxdandır məşq etmirdi, lakin formasını bərpa etdi. Çempionat oyunlarında iştirak edirdi. Biz ikinci dövrəyə başlayan zaman məşq prosesində dizindən zədə aldı.

– Mövsümün əvvəlində çempionluğu hədəfləmişdiz. İndi durum necədir?

– Mən mövsümün əvvəlində heç vaxt deməmişəm ki, hədəfimiz çempionluqdur. Demişəm ki, yüksək yerlər uğrunda mübarizə aparacağıq və aparırıq.

– Necə oldu ki, komandanız turnir cədvəlində 8-ci yerə düşdü. Sizcə, günah kimdədir?

– Burada günahkar axtarmaq lazım deyil. Biz 8-ci yerdəyiksə, günahkar axtarmağa ehtiyac yoxdur. Boşluqlarımız ola bilər, lakin komandadakı ab-hava normaldır. Komanda uduzanda istər-istəməz psixoloji gərginlik olur.

– “Kəpəz”də maliyyə durumu necədir?

– Divizion komandalarında necədirsə, bizdə də elədir.

– Siz özünüz maaşınızı vaxtı-vaxtında ala bilirsizmi?

– Sizi niyə mənim maaş alıb-almamağım maraqlandırır? Bəli, mənim futbolçularım, komanda üzvləri maaşlarını vaxtı-vaxtında ala bilirlər.

Mehri Qurban