AMADA-nın direktorunun rəhbərliyi altında yoxlama

Beynəlxalq müstəvidə antidopinq prosesində aktiv iştirak edən Azərbaycan Milli Antidopinq Agentliyi (AMADA) bu istiqamətdə öz töhfələrini verməkdə davam edir.

Komanda.az xəbər verir ki, AMADA-nın direktoru Şəfəq Hüseynli antidopinq tarixində ilk dəfə dövlətlərin Avropa Şurasının Antidopinq Konvensiyasına uyğunluğunun Monitorinq Qrupuna rəhbərlik edib.

Belə ki, dövlətlərin yerli qanunvericiliyinin və fəaliyyətinin Avropa Şurasının Antidopinq Konvensiyasına uyğunluğunun yoxlanılması çərçivəsində Niderland dövlətində monitorinq həyata keçirilib. Azərbaycan nümayəndəsi, AMADA-nın direktoru Şəfəq Hüseynlinin rəhbərlik etdiyi monitorinqin nəticələri Avropa Şurası tərəfindən təsdiqlənib.

Ötən ilin sentyabr ayında Niderland ölkəsinin konvensiyaya uyğunluğunu yoxlamaq məqsədilə Avropa Şurası tərəfindən 7 nəfərdən ibarət qiymətləndirmə qrupu yaradılmışdır. AMADA-nın direktoru Şəfəq Hüseynlinin rəhbərlik etdiyi qrupda Avropa Şurasının İdman Konvensiyalarının rəhbəri Sophie Kvasni, Avropa Şurasının baş mütəxəssisi Liene Kozlovska, Fransanın antidopinq təşkilatının baş hüquqşünası Floriane Cavel, Polşa antidopinq təşkilatının direktor müavini Hubert Dziudzik, Estoniyanın mədəniyyət nazirliyinin baş müşaviri Kaarel Nestor və Böyük Britaniyanadan olan mütəxəssis və məruzəçi Graham Artur təmsil olunmuşdur. Monitorinq Qrupu Niderlanda qiymətləndirmə səfəri etmiş, bu ölkənin idman nazirliyi, milli antidopinq təşkilatı, Milli Olimpiya Komitəsi, hüquq mühafizə orqanları, milli federasiyalar və idman mübahisələrinin həlli üzrə yaradılmış xüsusi qurumla ikitərəfli görüşlər keçirmiş, onların dopinqlə mübarizə sahəsində fəaliyyətinin Antidopinq Konvensiyasına və Ümumdünya Antidopinq Məcəlləsinə uyğunluğu yoxlamış və səfərin nəticəsi olaraq bir sıra istiqamətlərdə Niderland dövlətinə tövsiyələr verilmişdir.

Ötəni ilin dekabrın 14 də isə AMADA-nın direktoru Şəfəq Hüseynli Avropa Şurasının Antidopinq Konvensiyasının Monitorinq Qrupunun 54-cü iclasında rəhbərlik etdiyi monitorinq barədə yekun qiymətləndirmə hesabatı ilə çıxış edib. Daha sonra hesabat münasibət bildirilməsi üçün üzv ölkələrə təqdim edilmiş və bütün ölkələr tərəfindən təsdiqlənmişdir.