“Bizə yerli oyunçular lazım idi” – Emin Mahmudov

“Neftçi”nin kapitanı Emin Mahmudov bu gün start götürən təlim-məşq toplanışı barədə klubun televiziyasına açıqlama verib.

Komanda.az xəbər verir ki, 30 yaşlı yarımmüdafiəçi heyətlə bağlı bəzi problemlərin olduğunu bildirib:

“Komandada əhval-ruhiyyə yaxşıdır. Məşq prosesində hamı iştirak edə bilmir. Bununla belə, ciddi hazırlaşırıq. İstəyirik ki, 3-4-cü dövrələrdə daha yaxşı oynayaq”.

Eddi İsrafilov və Azər Salahlının “Neftçi”yə keçidinə toxunan Mahmudov, onların komandaya xeyir verəcəyinə inandığını deyib:

“Bizə yerli oyunçular lazım idi. Çünki komandada ancaq gənc futbolçular idi. Hər ikisini yaxşı tanıyıram. Bundan sonra rəqabət artacaq. İnanıram ki, bizə xeyir verəcəklər”.

Gənc futbolçuların əsas komanda ilə məşq etmələrinə də münasibət bildirən Mahmudov bunun önəmli amil olduğunu söyləyib:

“Onların bizimlə hazırlaşmaları hər zaman xoşdur. Əsas komandadakı ab-havanı hiss etməlidirlər. Ümid edirəm ki, bizə xeyir verəcəklər”.