Ronaldo “Real”a niyə gedib? – Ferqyusondan açıqlama

“Mançester Yunayted”in sabiq baş məşqçisi Aleks Ferqyuson 2009-cu ildə Kriştiano Ronaldonun “Real”a keçməsinin səbəbini açıqlayıb.

Komanda.az xəbər verir ki, şotland mütəxəssis, bununla bağlı “qırmızı şeytanlar”ın mətbuat xidmətinə danışıb:

“O, “Real”a getməyi arzulayırdı. Ona qarşı çıxmadım. Bu oğlan bizim komandada altı möhtəşəm il keçirmişdi. Onu başa düşdüm. Ona əvəzləyici axtarmalı idik. Ronaldonun yerinə Antonio Valensiyanı götürdük. O da bizim üçün inanılmaz dərəcədə yaxşı oynadı.

Ronaldonun böyük futbolçu olacağını bilirdim. Onun “Real”da möhtəşəm çıxış edəcəyini, titullar qazanacağını təxmin etmişdim. Hər bir güclü futbolçu “Real”da oynamaq istəyir”.

Ronaldo 2003-2009-da “Mançester Yunayted”də, 2009-2018-də “Real”da, 2018-2021-ci illərdə “Yuventus”da çıxış edib. Portuqaliyalı hücumçu ötən ay yenidən “Mançester Yunayted”ə qayıdıb və klubla iki illik müqavilə imzalayıb.