“90 dəqiqə dayanmadan mübarizə apardıq” – Murad Musayev

“Sabah”ın baş məşqçisi Murad Musayev Premyer Liqanın 20-ci turu çərçivəsində “Qəbələ”yə qarşı keçirdikləri oyunu şərh edib.

Komanda.az xəbər verir ki, o, 3:0 hesabıyla qalib gəldikləri matçdan sonra baş tutan mətbuat konfransında bunları söyləyib:

“Çətin oyun alındı, ikili mübarizələr çox oldu. Heç bir komanda güzəştə getmək istəmirdi. Şadam ki, 90 dəqiqə dayanmadan mübarizə apardıq və ikinci hissədə vurduğumuz qollarla vacib qələbə qazandıq. Elvin Camalovla Amin Seydiyevin fasilədə əvəzlənməsi onların ikinci sarı vərəqəni almamaları üçün atılmış addım idi. Qorxdum ki, meydandan qovularlar. Yəni bu, onların çıxışı ilə bağlı deyildi”.

Musayev zədədən sonra sıraya qayıdan Zurab Oçiqava və Namik Ələskərovun durumunu da dəyərləndirib:

“Zurab 6 ay zədə üzündən oynamadı. Təlim-məşq toplanışında yoxlama matçlarında demək olar ki, meydana çıxmadı. Yüz faiz hazır olduqdan sonra ona şans verə bilərəm. Amma onun mövqeyində çox güclü rəqabət var. Namikə gəlincə, dekabrda əməliyyat olundu və toplanış vaxtı yoxlama görüşlərində oynamadı. Son həftələrdə əvvəlki Namiki görməyə başlamışam”.