Elxan Məmmədov: “Qələbə münasibəti ilə “Qarabağ” klubunu təbrik edirəm, amma…”

“Qarabağ” UEFA Çempionlar Liqasının 3-cü təsnifat mərhələsinin ilk matçında səfərdə Kiprin APOEL klubunu 2:1 hesabıyla məğlub edib.

Komanda.az “Qarabağ”ın rəsmi “facebook” səhifəsinə istinadən xəbər verir ki, AFFA-nın baş katibi Elxan Məmmədov da oyunu stadiondan izləyib və qarşılaşmadan sonra fikirlərini bildirib:

“APOEL üzərində qələbə “Qarabağ” üçün, ümumilikdə Azərbaycan futbolu üçün çox vacib nailiyyətdir. Qələbə münasibəti ilə “Qarabağ” klubunu təbrik edirəm, amma heç bir halda arxayınlaşmaq olmaz. Cavab oyununa çox ciddi hazırlaşmaq lazımdır, təbii ki, mərhələni keçmək üçün hər iki oyunda qələbə qazanmaq vacibdir. Ümid edirəm və inanıram ki, “Qarabağ” Bakıda doğma azarkeşləri qarşısında da səfərdə olduğu kimi yüksək keyfiyyətli oyun göstərərək, növbəti mərhələyə vəsiqəni təmin edəcək. Bir daha bütün “Qarabağ”lıları təbrik edirəm”.