Qurban Qurbanov gürcüstanlı qapıçını müdafiə etdi

“Qarabağ”ın baş məşqçisi Qurban Qurbanov Fransada “Marsel”ə 1:3 hesabı ilə uduzduqları ilk oyunda səhvlərə yol vermiş qapıçı Luka Quqeşaşvilini müdafiə edib:

Komanda.az xəbər verir ki, Qurbanov, bu gün keçirilən mətbuat konfransında gürcü qapıçının çıxışı haqda bunları deyib:

“Futbolçuların səhvini açıq şəkildə müzakirə etməyi xoşlamıram. Quqeşaşvilinin üstün cəhəti soyuqqanlı olmasıdır. Texniki səhvlərdən heç kim sığortalanmayıb. Avropada da bunları görürük. Biz nadir hallarda belə oyunlara çıxdığımız üçün bu cür səhvlər qlobal problemə çevrilir. Onunla söhbətimiz olub. Futbolçu inkişaf etmək istəyirsə, bütün turnirlərdə iştirak etməlidir. Lukanın potensialı var. Elə qurtarışları olub ki, alqışa layiqdir. Bu cür səhvləri daha çox məşq etməklə aradan qaldırmaq olar. Özü də ən yaxşısını, qələbədə pay sahibi olmaq istəyir. İnanıram ki, tezliklə belə səhvlər aradan qaldırılacaq.

Bəzən rəqiblərin də səhvləri olub və biz yararlanmışıq. Bu qapıçıya inanır və güvənirəm. O da qələbədə pay sahibi olmaq istəyir. İnanıram ki, səhvlər aradan qaldırılacaq”.

Fevralın 24-də Tofiq Bəhramov adına Respublika stadionunda keçiriləcək “Qarabağ” – “Marsel” oyunu saat 21:45-də başlayacaq.