“Onlarsız futbolun marağı olmur” – Qurban Qurbanov

“Qarabağ”ın baş məşqçisi Qurban Qurbanov Azərbaycan Kubokunun 1/4 final mərhələsinin “Qəbələ” ilə ilk oyunundan sonra açıqlama verib.

Komanda.az xəbər verir ki, o, 2:2 hesabıyla başa çatan matçdan sonra keçirilən mətbuat konfransında bunları deyib:

“Əsl kubok oyunu idi. Hər iki komanda qələbə qazanmaq istəyirdi. Rəqib qalib gəlməyə layiq idi. Oyunçularım istəkli idilər, çox çalışdılar. Qələbə topunu vurduq. Amma sonra diqqətsizlik etdik. Cavab oyunu maraqlı olacaq. O da əsl kubok görüşü olacaq.

Oynamağa məcburuq. 3 oyun eyni komandaya qarşı oynamaq xoşdur. Bəzi illərdə də belə olub. Belə matçlarda diqqətli olmalısan. Baxmayaraq ki, 3 oyun oynayırsan, lakin istəkli oynamalısan.

“İmarət Tayfa”nın yoxluğu hiss olundu. Azarkeşsiz futbol əhval-ruhiyəsi yox idi.

Ümumiyyətlə, “Neftçi” ilə oyunda olanlar çox olur. Narazılıqlar, etirazlar daima olub. Ən çox da polis işçiləri ilə. Hər bir halda, azarkeşləri küsdürmək olmaz. Onlarsız futbolun marağı olmur. Bizim azarkeşlərlə problemimiz olmur. Mən həmişə onların yanındayam. Hər oyunda eyni azarkeş sayı olmur. Bu problem qısa zamanda aradan qaldırıla bilər.

Kadi Borges barədə kluba rəsmi müraciət daxil olmayıb. Rəsmi məlumat gəlsə, biz qərar verməyə hazırıq.

Abbas Hüseynov tezliklə komanda ilə məşqlərə başlayacaq. Növbəti oyunlarda baxacağıq.

DÇ-2022-də İspaniya yığmasının mübarizəni dayandırması məni təəccübləndirmədi. Futbol sürprizlərlə doludur. Ümumiyyətlə, son vaxtlar İspaniya futbolu dedikdə ağıla pas gəlir. Cavan futbolçuları çoxdur. Pas oyunu dedikdə fərqli düşüncələr yaranır. Son vaxtlar “Qarabağ” sürətli hücum futbolu oynayır. Futbolun dili düzgün ötürmədir. Oyun tərzini təkmilləşdirmək lazımdır. İspan futboluna baxsaq, tam fərqli oyunlar görə bilərik. Hər bir halda, bir uğursuzluğa görə sistemi dəyişmək komandaya zərbə vura bilər. İspaniya futbolunun baş bilənləri hər şeyi daha yaxşı bilir. İnsan var tək qoldan həzz alır, insan da var düzgün ötürmələrdən. Bütün dünya futbolu İspaniya futbolundan çox şey öyrənib. Məşqçilər özünə lazım olan məsələləri futbolçularına uyğunlaşdırır. Sürprizlər çox olur. Məncə, onlar daha da təkmilləşəcəklər”.

Rövşən Əlisoy

Bizi Telegramda izləyin

Bizi izləyin Bizi Facebook-da izləyin

Əlaqəli yazılar

Back to top button