Azərbaycan millisinin cüdoçularına ustad dərsi keçdilər

Beynəlxalq Cüdo Federasiyasının Akademiyasının ekspertləri Azərbaycanda cüdoçu qızlara ustad dərsi keçiblər.

Azərbaycan Cüdo Federasiyasından Komanda.az-a verilən məlumata görə, qurumun təşəbbüsü ilə baş tutan dərslər yeniyetmə və gənclərdən ibarət yığma komandanın üzvləri üçün təşkil olunub.

Ustad dərsi Beynəlxalq Cüdo Federasiyasının Akademiyasının ekspertləri Mesut Kapan və Rio-2016 Yay Olimpiya Oyunlarının qızıl medalçısı Tina Trestinyak tərəfindən keçirilib.

Trestinyak bir sıra cüdo texnikasını, xüsusilə də, beynəlxalq turnirlərdə və Olimpiya Oyunlarında istifadə edərək qalib gəldiyi fəndləri idmançılara nümayiş edib. Olimpiya çempionunun sözlərinə görə, idmançılar sırasında potensialı böyük olan qızlar var və onlar təcrübə toplayaraq, gələcəkdə daha peşəkar idmançı olaraq, beynəlxalq səviyyədə nəticə əldə edəcəklər.