“Bəzən rəqibi də düzgün dəyərləndirmək lazımdır” – Ançelotti

“Real”ın baş məşqçisi Karlo Ançelotti İspaniya La Liqasının ikinci turunun “Almeriya” ilə görüşü (3:1) haqda danışıb.

Komanda.az klubun rəsmi saytına istinadən xəbər verir ki, o, rəqibin fantastik hücum nəticəsində qol vurduğunu söyləyib:

“Rəqib ilk əks-hücumda bizi yaxaladı. Məncə, mükəmməl idilər. Onlara qarşı daha baxımlı oynaya bilərdik. Bəzən rəqibi də düzgün dəyərləndirmək lazımdır. Fantastik hücum qolla nəticələndi. Biz də nəzarəti itirmədik və oyundan qopmadıq. Çoxlu qol epizodlarımız oldu. Meydançada çox yaxşı hərəkət etdik.

Andrey Lunin 1-ci turda olduğu kimi, yenə gözəl oynadı. Həm ona, həm də Kepa Arrisabalaqaya güvənirik.

Çud Bellingem yetkin xarakterə sahib futbolçudur. O, son üç ili Almaniyada keçirib. Bu məqamlar onun İspaniyaya və bizim oyun üslubumuza uyğunlaşmağına kömək edir”.

“Kral klubu” növbəti turda “Selta”nın qonağı olacaq, “Almeriya” isə “Kadis” səfərinə yollanacaq.