“Qarabağ” kimi böyük klubda kim oynamaq istəməz ki?” – MÜSAHİBƏ

“Şamaxı” klubunun futbolçusu Adil Nağıyevin Komanda.az saytına müsahibəsi:

– Adil, əvvəlcə “Səbail”lə oyunla bağlı danışaq. Oyunun heç-heçə bitəcəyini düşünürdün?

– Biz “Səbail”lə oyuna üç xal qazanmaq üçün çıxmışdıq. Heç-heçə bizi qane etmədi, məyusuq.

– “Şamaxı” bu mövsüm ilk xalını qazandı. Səncə, növbəti oyunlarda daha yaxşı nəticələr əldə edə biləcəksiz?

– Bu oyunda da, bundan öncəki oyunlarda da göstərdik ki, futbol istək, mübarizə oyunudur. Dünən meydanda bir komanda var idi, o da “Şamaxı”. Fərdi səhvlərdən qol buraxdıq. Futbolda bu cür hallar baş verir.

– “Şamaxı”nın bu mövsüm hədəfi nədir?

– Bu mövsüm hədəfimiz yaxşı, mübariz komanda olmaqdır. Bacardığımız qədər yuxarı pillələrə irəliləməliyik.

– Bu mövsümdən “Şamaxı”ya icarəyə verilmisən. Klubun hazırkı durumu səni qane edir?

– Klubda hər şey qaydasındadır, futbol üçün hər bir şərait var.

– Klubun maddi durumu necədir?

– Hazırda klubda maddi durum yaxşıdır.

– Gələcəkdə Azərbaycanda və ya ölkədən kənarda hansı klubda çıxış etmək istəyərsən? Nə kimi planların var?

– Gələcəkdə nəyin necə olacağını görəcəyik. Əlbəttə, yaxşı çempionatlarda ölkəmizi təmsil etmək istəyərəm.

– Azərbaycan millisində çıxış etmək istəyərsən?

– Millidə çıxış etmişəm, lakin istədiyim kimi alınmayıb. İndi üzərimdə çalışıram. Meydanda əlimdən gələnin ən yaxşısını etməyə çalışıram ki, yenidən milliyə dəvət alım.

– Əslində “Şamaxı”nın baş məşqçisi kimdir, Vüqar Əsgərli, yoxsa Cavid Hüseynov?

– Baş məşqçimiz də, köməkçilərimiz də eynidir. Bir yerdə çalışırlar, bir yerdə düşünürlər və bir qərar verirlər.

– Oyunlar üçün heyəti kim qurur, Hüseynov, yoxsa Əsgərli?

– Klub Cavid Hüseynova tapşırılıb. Amma köməkçi məşqçilər də baş məşqçi rolunu oynayır. Hər kəs əlindən gələni etməyə çalışır.

– “Qarabağ”ın Çempionlar Liqasında oyunlarını izləyirsən? Bu komandada oynamaq istərdin?

– Əlbəttə, “Qarabağ”ın hər bir oyununu izləyirəm. Bu cür böyük klubda kim oynamaq istəməz ki?

– Səncə, niyə başqa klublarımız “Qarabağ” kimi uğurlu ola bilmir?

– “Qarabağ” hər bir cəhətdən bütün klublarımızdan fərqlənir. Bunu bir-bir sadalasam, çox vaxtımızı alacaq. “Qarabağ” bizim yeganə qürur mənbəyimizdir.

Mehri Qurban