“The Best”: De Byazi və Mahmudov kimə səs verib?

Azərbaycan millisinin baş məşqçisi Canni De Byazi və kapitanı Emin Mahmudovun “The Best” mükafatı üçün kimlərə səs verdikləri bəlli olub.

Komanda.az xəbər verir ki, italiyalı mütəxəssis və “Neftçi”nin futbolçusu 2022-ci ilin ən yaxşı futbolçusu sorğusunda fərqli oyunçulara səs veriblər.

De Byazi ümumilikdə sıralamanı düzgün təxmin edib. O, argentinalı Lionel Messini birinci, fransalı hücumçulardan Kilian Mbappeni ikinci, Kərim Benzemanı isə üçüncü yerdə göstərib. Emin Mahmudovun fikrincə isə Benzema ötən ilin ən yaxşısıdır. O, PSJ-də çıxış edən Mbappe ilə Messini müvafiq olaraq 2-3-cü yerlərə layiq görüb.

İlin ən yaxşı baş məşqçisi nominasiyasında De Byazi həmkarlarını bu cür sıralayıb: Karlo Ançelotti (“Real”, İspaniya), Lionel Skaloni (Argentina), Valid Reqraqi (Mərakeş). Mahmudov da ilk iki sıranı baş məşqçisi kimi seçib. Ancaq o, üçüncü yerə İngiltərənin “Mançester Siti” klubunun “sükanı arxasında” olan Pep Qvardiolanı layiq bilib.

Millinin kapitanının qapıçı seçimi bir qədər qəribə olub. Onun fikrincə, Mərakeş yığmasının və “Sevilya”nın qolkiperi Yassin Bunu 2022-ci ilin ən yaxşısıdır. Mahmudov “Real”ın belçikalı dəri əlcək sahibi Tibo Kurtuanı ikinci, “Liverpul”da oynayan braziliyalı Alisson Bekkeri üçüncü pilləyə yazıb. Maraqlıdır ki, Emin Mahmudovun ilk üçlüyə layiq bilmədiyi argentinalı Emiliano Martinesin qalib gələcəyini Canni De Byazi düzgün müəyyənləşdirib. Baş məşqçi Yassin Bunuya ikinci, Tibo Kurtuaya üçüncü yeri verib.

Qadın futbolçulardan ibarət Azərbaycan yığmasının baş məşqçisi və kapitanının da səsvermədə kimlərin adını qeyd etdiyi bəlli olub. Baş məşqçi Siyasət Əsgərov ilk üçlüyü bu qaydada sıralayıb: Aleksandra Popp (Almaniya), Aleks Morqan (ABŞ), Aitana Bonmati (İspaniya). Kapitan Sevinc Cəfərzadə də ilin ən yaxşısı seçilən Aleksia Putelyası (İspaniya) ilk üçlüyə layiq görməyib. O, müvafiq olaraq Aleksandra Popp, həmçinin ingiltərəli Lea Uilyamson və almaniyalı Lena Oberdorfa səs verib.

İlin ən yaxşı qadın məşqçi nominasiyasında Siyasət Əsgərov 1-ci yerə Sarina Vyeqmanı (Niderland), 2-ciliyə Martina Voss-Teklenburqu (Almaniya), üçüncü pilləyə isə Pia Sundeyci (Braziliya) layiq bilib. Sevinc Cəfərzadənin sıralaması isə bu cür olub: Martina Voss-Teklenburq, Sarina Vyeqman, Bev Priestman (Kanada).

Baş məşqçi və kapitanın ən yaxşı qadın qapıçı sorğusundakı səsverməsi belədir: Siyasət Əsgərov – 1. Meri Erps (İngiltərə), 2. Merle Froms (Almaniya), 3. Sandra Panos (İspaniya); Sevinc Cəfərzadə – 1. Merle Froms, 2. Meri Erps, 3. Ann-Katrin Berger (Almaniya).

Ən yaxşı qadın baş məşqçi Sarina Vyeqman, qapıçı isə Meri Erps seçilib.

Bizi Telegramda izləyin

Bizi Facebook-da izləyin

Əlaqəli yazılar

Back to top button