Teymur Rəcəbov Azərbaycan millisində oynamaqdan imtina etdi

Azərbaycan şahmatının liderlərindən olan Teymur Rəcəbov millidə çıxış etməkdən imtina edib.

Komanda.az xəbər verir ki, 35 yaşlı qrossmeyster yığmamızla Şahmat Olimpiadasında iştirak etməyəcək.

Teymurun əvəzinə milli komandamıza Nicat Abbasov sonuncu löhvə kimi əlavə edilib. Orda yarışacaq beş nəfərlik heyətimiz belədir: Şəhriyar Məmmədyarov, Rauf Məmmədov, Qədir Hüseynov, Vasif Durarbəyli və Nicat Abbasov.

Bu yerdə bildirək ki, Rəcəbov bu yaxında beynəlxalq turnirin gedişatında səhhətində yaranmış problemə görə çıxışını yarımçıq dayandırmışdı. O, indi də sağlıq duurmundakı problemi önə çəkərək belə bir qərar verib.

Lakin Vasif Durarbəyli “Facebook” səhifəsində onun bu imtinayla bağlı fikirlərini yazaraq komanda yoldaşını qınayıb: “Şəxsi turnirlərdə hər kəs sırf öz mənfəəti, yığmada isə ümumi xeyir üçün iştirak edir. Kimi Məmməd Arazın “Vətən mən oğul desə nə dərdim, mamır olub qayasında bitərdim” kəlamını əyani həyatımızda nümayiş etdirir. Kimi də Rəcəbov kimi milyonlarla yatırım alır, amma sonsuz mənəvi məsuliyyətinin olduğunu görünür dərk etmir. 2019-da son anda yorğunluq bəhanə edib komandanı yarı yolda qoymaq, 2021-də 8 oyun mübarizəsiz heç-heçələr, indiki imtina və hələ bildiyim amma bölüşmədiyim bir çox qeyri-ictimai məlumatlar mənə bunu deməyə əsas verir. Qısası, məncə Rəcəbov iki əli qanda olsa belə özünü bu olimpiadaya yetirməli idi! Etmədiyinə görə də onu qınayıram”.

44-cü Şahmat Olimpiadası bu il iyulun 28-dən avqustun 10-dək Hindistanın Tamil Nadu ştatının paytaxtı Çennay şəhərində keçiriləcək. Moskva və Xantı-Mansiyskdə keçirilməli olan bu məsul yarış FİDE-nin Ukraynadakı müharibəyə reaksiyasından sonra Rusiyadan çıxarılıb.

Xatırladaq ki, Rəcəbov Serbiyada komanda yarışında Avropa çempionu olan şahmat yığmamızın heyətində olub.

Bizi Telegramda izləyin

Bizi izləyin Bizi Facebook-da izləyin

Əlaqəli yazılar

Back to top button