Azərbaycan millisinin dünya çempionatı üçün heyəti açıqlandı 

Noyabrın 14-də Meksikanın Qvadalaxara şəhərində taekvondo üzrə dünya çempionatı start götürəcək. 

Komanda.az xəbər verir ki, 7 gün davam edəcək mundailda Azərbaycan milli komandası da mübarizə aparacaq. 

Meksikada ölkənin idman şərəfini 8 taekvondoçu qoruyacaq. Kişilərdən ibarət yığmanın baş məşqçisi Reza Mehmandost və böyük məşqçi Elnur Amanov dünya çempionatında Səyyad Dadaşov (54 kq), Qaşım Maqomedov (58 kq), Sədri Həmidreza (63 kq), Cavad Ağayev (68 kq), Eltac Qafarov (74 kq) və Taleh Süleymanova (87 kq) şans verəcək. Məşqçilər korpusu Azərbaycan Taekvondo Federasiyasının (ATF) İdarə Heyəti ilə məsləhətləşdikdən sonra son aylarda toplanışlara qatılmayan və hazırda formasından uzaq olan Milad Beiqi Harçeqani (87 kq) ilə Radik İsayevin (+87 kq) heyətinə daxil edilməsinə ehtiyac görməyib. 

Qadınlardan ibarət milli komandanın baş məşqçisi Səbuhi Zülfüqarov isə Qvadalaxarada Minayə Əkbərova (46 kq) və Patimat Abakarovanı (49 kq) sınayacaq. Fəridə Əzizova (67 kq) zədəli olduğundan heyətdən kənar qalıb. 

Dünya çempionatında ədaləti qoruyacaq referilər sırasında beynəlxalq dərəcəli hakim Aygül Abdyllayeva da yer alacaq. 

Komandaya ATF-in vitse-prezidentləri Nağı Səfərovla Niyaməddin Paşayev rəhbərlik edəcəklər. 2023-cü ildə dünya çempionatı Bakıda keçiriləcəyindən, yığma Meksikaya geniş tərkiblə yollanacaq. Bu səfər Qvadalaxarada mindial başa çatdıqdan sonra yarışın keçici bayrağının Azərbaycana verilməsinə və bir sıra texniki məsələlərlə bağlı fikir mübadiləsi aparılmasına hesablanıb. 

Qvadalaxaraya noyabrın 9-da yollanacaq komanda Azərbaycana ayın 24-də qayıdacaq. 

Taekvondoçularımızdan noyabrın 15-də Süleymanov, ertəsi gün Ağayevlə Abakarova, ayın 17-də Qafarov, bir gün sonra Həmidreza dayanq üzərinə çıxacaqlar. Noyabrın 19-da Dadaşov, yarışın sonuncu günündə isə Maqomedovla Əkbərova mübarizəyə başlayacaqlar. 

Bizi Telegramda izləyin

Bizi izləyin Bizi Facebook-da izləyin

Əlaqəli yazılar

Back to top button