Maquayr Reşfordun mümkün qayıdışı haqda danışdı

“Mançester Yunayted”in müdafiəçisi Harri Maquayr, hücumçu Markus Reşfordun mümkün qayıdışı ilə bağlı fikirlərini bölüşüb.

Komanda.az xarici KİV-ə istinadən xəbər verir ki, o, komanda yoldaşı ilə münasibətlərinin yaxşı olduğunu vurğulayıb və onun yüksək səviyyəli futbolçu olduğunu bildirib:

“Reşfordla fantastik münasibətlərim var və illər ərzində bir çox gözəl anlar yaşamışıq. Onun nə qədər əla oyunçu ola biləcəyini bilirəm. Əminəm ki, qarşılıqlı məqbul bir həll yolu tapmaq klubdan və Reşforddan asılıdır.

Əlbəttə ki, o, qayıdarsa, onun oynamasını, xoşbəxt və özünəinamlı olmasını istəyirik. Bu, həm onun üçün, həm də klub üçün doğru olmalıdır. Amma hər kəs bilir ki, Reşford gələn mövsüm istənilən klubda oynasa, çox yüksək səviyyəli futbolçu olacaq”.

Reşford 2025/26 mövsümündə icarə əsasında “Barselona”nın heyətində 49 oyunda 14 qol vurub və 14 məhsuldar ötürmə edib. Onun “Mançester Yunayted”lə müqaviləsinin müddəti isə 2028-ci ilin iyun ayına qədərdir.