DÇ-2026: Özbəklərdən nümunəvi davranış

Özbəkistan millisi 2026-cı il dünya çempionatındakı debüt oyunundan sonra davranışı ilə diqqət çəkib.

Komanda.az xarici KİV-ə xəbər verir ki, Kolumbiya millisinə 1:3 hesabı ilə məğlub olan Asiya təmsilçisinin üzvləri matçdan sonra paltardəyişmə otağını səliqəyə salaraq ev sahibi tərəfə təşəkkür mesajı qoyublar.

Özbəkistan Futbol Assosiasiyasının sosial şəbəkə hesabında paylaşılan mesajda bunlar qeyd olunub:

“Meksika, çox təşəkkür edirik. Dünya çempionatında uğurlar. Rəhmət”.

Özbəkistan – Kolumbiya matçı Meksikadakı stadionda keçirilib və Cənubi Amerika təmsilçisinin 3:1 hesablı qələbəsi ilə yekunlaşıb.

Fabio Kannavaronun rəhbərlik etdiyi komanda mundialdakı növbəti oyununda Portuqaliya millisi ilə üz-üzə gələcək.