“Düşünürəm ki, Pedri “Barselona” ilə müqaviləsini uzadacaq” – Deku

“Barselona”nın idman direktoru Deku yarımmüdafiəçi Pedrinin klubla yeni müqavilə imzalayacağına inanır.

Komanda.az xəbər verir ki, portuqaliyalı funksioner yerli mətbuata açıqlamasında Pedrinin klubda rahat olduğunu bildirib:

“Əsas məqam oyunçunun istəyidir. Futbolçulara nə lazımdır? Rəqabətli komanda, kuboklar, yaxşı müqavilə. Buna əsaslanaraq, düşünürəm ki, Pedri “Barselona” ilə müqaviləsini uzadacaq. O, klub üçün tarix yazmaq istəyir. Burada rahatdır, xoşbəxtdir və kuboklar qazanmağa çalışır. İllər boyu zədələrdən əziyyət çəkdikdən sonra ən yaxşı formasına qayıdıb”.

21 yaşlı futbolçunun klubla hazırkı müqaviləsi gələn mövsümün sonunda başa çatacaq. Kataloniya klubunun rəhbərliyinin bir neçə ay əvvəl ispaniyalı yarımmüdafiəçi ilə müqavilənin uzadılmasını artıq müzakirə etdiyi xəbəri yayılmışdı.