“Bu gün oyunun nəticəsinə o qərar verdi” – Valverde

Çempionlar Liqasının yarımfinal mərhələsinin ilk oyunları çərçivəsində öz meydanında “Liverpul”a 3:0 hesabı ilə qalib gələn “Barselona”nın baş məşqçisi Ernesto Valverde matçdan sonra açıqlama verib.

Komanda.az İspaniya mətbuatına istinadən xəbər verir ki, 55 yaşlı mütəxəssis, oyunun nəticəsinə Lionel Messinin qərar verdiyini deyib:

“Bəzən oyunun tempini müəyyənləşdirə bilərsiz, bəzən isə bunu bacarmazsız. Bu gün oyunun tempinə “Liverpul” qərar verdi. Biz tempi salmağa çalışdıqca, onlar sürətli oynayaraq, tempi yüksəltdilər. Həqiqət budur ki, “Liverpul”un da qalib gəlmək şansları vardı. Biz oyunda geri düşə bilərdik, məğlub ola bilərdik, amma çox güclü komandaya qarşı oyunda möhtəşəm nəticə əldə etdik.

Messi insanları təəccübləndirməkdən heç vaxt imtina etmir. O, bizim kapitanımız, oyun ritmimizi müəyyənləşdirən liderimizdir. Bu gün oyunun nəticəsinə o qərar verdi”.