“Beşiktaş”dan “Başakşəhər”lə heç-heçə

Futbol üzrə Türkiyə Super Liqasında 28-ci tura yekun vurulub.

Komanda.az xəbər verir ki, ilk oyun günündə bir görüş baş tutub. Turun açılış matçında “Yeni Malatyaspor” “Adana Dəmirspor”u qəbul edib. Bu oyunda meydan sahibləri minimal hesabla üstün olublar.

Şənbə günü üç qarşılaşma baş tutub. “Rizəspor” doğma meydanda “Girəsunspor”a, “Göztəpə” isə “Kasımpaşa”ya uduzub.

Böhranlı günləri unutmağa çalışan “Qalatasaray” “Konyaspor”un qonağı olub. “Sarı-qırmızılar” qələbə seriyasını davam etdirmək niyyətindəydi. Tarixində ilk dəfə Çempionlar Liqasına vəsiqə qazanmağa yaxın olan “Konyaspor” isə evdə asanlıqla xal itirməyi xoşlamır. Sözügedən kollektiv “Qalatasaray”ı da məğlub yola salmağı bacarıb.

Bazar günü üç qarşılaşma baş tutub. “Fatih Karagümrük” – “Altay” matçında qapılara qol vurulmayıb. “Antalyaspor” doğma meydanda “Sivasspor”u minimal hesabla üstələyib.

Bu tur əsas diqqətlər “Ülkər stadyum”a yönəlmişdi. Burada “Fənərbaxça” çempionluğa ən real namizəd sayılan “Trabzonspor”u qəbul edib. Vahid lider olan Qaradəniz təmsilçisi ən yaxın izləyicisini 17 xal qabaqlayırdı. Trabzonlular İstanbuldan da 1 xalla qayıtmağı bacarıblar.

Sonuncu oyun günündə üç qarşılaşma baş tutub. “Beşiktaş” doğma meydanda “Başakşəhər”lə qarşılaşıb. Dörd qolun qeydə alındığı bu oyunda qalib müəyyənləşməyib. “Qaziantep” – “Hatayspor” matçında da tərəflər meydanı hərəyə 2 qol və 1 xalla tərk ediblər. “Kayserispor” isə evində “Alanyaspor”a məğlub olub.

Türkiyə Super Liqası, 28-ci tur

4 mart

Yeni Malatyaspor – Adana Dəmirspor 1:0
Qol: Şuyar, 77.

5 mart

Rizəspor – Girəsunspor 1:2
Qol: Pohyanpalo, 14 – Çikinyo, 45+3. Traore, 48.

Göztəpə – Kasımpaşa 2:3
Qol: Di Santo, 7. Ndiaye, 80 – Muleka, 5; 48. U.Bozok, 79.

Konyaspor – Qalatasaray 2:0
Qol: Koka, 8. Rahmanoviç, 20.

6 mart

Fatih Karagümrük – Altay 0:0

Fənərbaxça – Trabzonspor 1:1
Qol: Zayç, 71 – Nvakaeme, 22.

Antalyaspor – Sivasspor 1:0
Qol: Fernando, 45+2.

7 mart

Kayserispor – Alanyaspor 1:2
Qol: Bertolaççi, 34 – O.Aydın, 41. E.Yardımçı, 83.

Beşiktaş – Başakşəhər 2:2
Qol: G.Yalçın, 41. K.Karaman, 54 – Trezeqe, 35. Okaka, 45+4.

Qaziantep – Hatayspor 2:2
Qol : Maksim, 5; 79 – Koker, 20-öz qapısına. El Kaabi, 30.