“Paris olimpiadasında məqsədimiz iki qızıl medal qazanmaqdır”

Boks üzrə Azərbaycan millisinin baş məşqçisi Umberto Orta Dominqes Serbiyanın paytaxtı Belqradda keçirlmiş dünya çempionatının nəticələrindən danışıb.

Komanda.az xəbər verir ki, o, federasiyasının rəsmi saytına açıqlamasında bunları söyləyib:

“Dünya çempionatı bizim üçün uğurlu alındı. Federasiyanın yaratdığı şərait boksçularımızın inamlı çıxışında böyük rol oynadı. Yarışda 88 ölkədən 500-dən çox boksçu iştirak edirdi. Elə bir mundial oldu ki, hər bir idmançı 5 və ya 6 görüş keçirməli idi. Keçirdiyimiz gərgin təlim-məşq toplanışlarının sayəsində bu medalları əldə edə bildik”.

Təcrübəli mütəxəssisin sözlərinə görə, üç döyüşdəki məğlubiyyət baş məşqçi kimi ona təsir edib:

“Tayfur Əliyevin 1/8, Məsud Yusifzadənin 1/4 və Məhəmməd Abdullayevin 1/2 final görüşlərini nəzərdə tuturam. Onlar layiq olduqları qələbə ilə qiymətləndirilsəydi, medallarımızın sayı və əyarı müxtəlif ola bilərdi. Buna baxmayaraq, özümüzü xoşbəxt hiss edirik. İki illik zəhmətimizin bəhrəsini gördük və bizim üçün ən önəmlisi budur. Bu nəticəni daha da yaxşılaşdırmaq üçün davam etməliyik”.

Kubalı baş məşqçi rinqdən kənarda aqressiv olmasına da aydınlıq gətirib: “Bu, idmandır və məşqçiyə aid olan xüsusiyyətdir. Məqsəd boksçuların rinqdə dediklərimi etməsi üçündür. Onlara qarşı hansısa təzyiq deyil. Əksinə, daha da irəli getmələrinə hesablanan addımdır. Gələcək hədəflərimiz daha yüksəkdir. Paris Yay Olimpiya Oyunlarında məqsədimiz iki qızıl medal qazanmaqdır. Ən azından dünya çempionatında qazandığımız mükafatlarla özümüz üçün yolu açdıq”.

Azərbaycan millisi dünya çempionatını 1 qızıl, 2 bürünc medalla başa vurub. Alfonso Dominges (86 kq) qızıl, Sərxan Əliyev (71 kq) və Məhəmməd Abdullayev isə (+92 kq) bürünc medal qazanıb.