“Bizi nəyin gözlədiyini və nələr edəcəyimizi bilirik” – Zidan

“Real”ın (İspaniya) baş məşqçisi Zinəddin Zidan Çempionlar Liqasının yarımfinal mərhələsi çərçivəsində “Çelsi”yə (İngiltərə) qarşı keçirəcəkləri cavab oyunu ilə bağlı fikirlərini bildirib.

Komanda.az xəbər verir ki, UEFA-nın mətbuat xidmətinə danışan Zidan, matçla bağlı bunları deyib:

“İçimdə yaxşı hisslər var. Belə bir oyunda olacağımıza sevinirik. Bizi nəyin gözlədiyini və nələr edəcəyimizi bilirik. Bütün gücümüzü meydanda qoyacağıq.

Kapitanımız Serxio Ramos bizimlə bura gəlib. Oyunda iştirak edib-etməyəcəyini deyə bilmərəm, lakin yanımızda olacaq. Kapitanımızın bizimlə olması çox vacib bir şeydir.

Meydana çıxıb, öz futbolumuzu oynamalıyıq. Ya 90 dəqiqə, ya 120 dəqiqə, fərq etməz. Oyuna yaxşı hazırlaşmışıq. Çempionlar Liqasının yarımfinalındayıq və burda olmaq hamıya qismət olmur”.

Bu gün keçiriləcək “Çelsi” – “Real” matçı saat 23:00-da start götürəcək. Komandalar arasında İspaniyada baş tutan ilk görüşdə qollu bərabərlik qeydə alınıb – 1:1.