“Vətənə uğurla dönməliyik” – Azərbaycan yığmasının üzvü

“Hazırlığımız yüksək səviyyədə davam edir. May ayından etibarən güclü və gərgin məşqlərimiz keçir”.

Komanda.az xəbər verir ki, bu sözləri kişilərdən ibarət Azərbaycan millisinin voleybolçusu Andrey Vasilenko federasiyanın mətbuat xidmətinə açıqlamasında deyib.

O, çıxış edəcəkləri yarışların vacibliyini və qarşıda duran məqsədləri yaxşı başa düşdüklərini bildirib:

“Həm Türkiyənin Konya şəhərində keçiriləcək 5-ci İslam Həmrəyliyi Oyunları, həm də Avropa çempionatının təsnifat oyunlarında yaxşı çıxış etməli, vətənə uğurla dönməliyik”.

Vasilenkonun sözlərinə görə, məşqçilər hazırlığın ilk günündən hər bir oyunçunun qarşıdakı yarışlarda ən yüksək formada çıxış etməsi üçün çalışdıqlarını söyləyib:

“Hazırlığın növbəti mərhələsində gücümüzü yoxlama oyunlarında sınayacağıq. Bu oyunlar zamanı komandamızın hansı mövqelərində çatışmazlıqlar varsa, onları aradan qaldıracağıq. İnanıram ki, toplanışın yekununda ən yüksək formada olacaq və əsas oyunlarda uğurla çıxış edərək, azarkeşlərimizi sevindirəcəyik”.