“Hazırlaşmaq üçün vaxtımız azdır” – Millinin qapıçısı

Futzal üzrə Azərbaycan milli komandası dünəndən etibarən təlim-məşq toplanışına başlayıb.

Komanda.az xəbər verir ki, milli komanda avqustun 17-də və 19-da Türkmənistan yığması ilə yoxlama oyunları keçirəcək.

Heyətə əsasən milli komandaya namizədlər dəvət olunsa da, təcrübəli futzalçılar da var. İlk məşqdən sonra Emin Kürdov federasiyanın rəsmi saytına açıqlama verib:

“Mənim üçün bu dəfə fasilə uzun çəkdi. Təsəvvür edin, hər il iyulda məşqlərə başlayırdıq, amma indi avqustun 9-da ilk məşqimə çıxdım. Qarşıdakı müddət oyunlara hazırlaşmaq baxımından azdır, çalışmalıyıq ki, vaxtdan maksimum istifadə edək. Heyətimizə əsasən gənclər dəvət olunub. 3-4 təcrübəli futzalçı var, hansı ki onlar əsas millinin üzvləridir. Yoldaşlıq oyunu olsa da, həm heyət baxımından, həm də hazırlıq müddəti baxımından çətinlik qaçılmazdır. Müsbət nəticə daha çox gənc oyunçularımızda özünə inamı artırmaq üçün vacibdir. Onlar da çalışacaqlar ki, özlərini yaxşı tərəfdən göstərsinlər, baş məşqçinin etimadını qazansınlar, həm də azarkeşlərimizi sevindirsinlər. Çünki futzal millimiz hər zaman yaxşı nəticələri, inamlı oyunu ilə seçilib, yadda qalıb. Türkmənistan millisi də son illərdə inkişafdadır. Onlar əvvəlki illərdə də Bakıda toplanış keçiriblər”.