Mahir Emrelinin keçmiş komanda yoldaşı Super Liqa klubunda

Türkiyənin “Qaziantep” klubu heyətini yeni futbolçu ilə gücləndirib.

Komanda.az xəbər verir ki, Super Liqa təmsilçisi Polşanın “Legiya” (Varşava) klubunun hücumçusu Tomaş Pexartı heyətinə qatıb.

33 yaşlı futbolçu Varşava təmsilçisindən azad agent kimi ayrılıb. Bu üzdən də, qazianteplilər bu keçidə görə əlavə xərcə düşməyiblər. Çexiyadan olan hücumçu ilə 2 illik müqavilə imzalanıb.

Pexart 2020-ci ilin fevralından “Legiya”da forma geyinirdi. O, bu komandanın heyətində keçirdiyi 3 mövsüm ərzində 90 oyuna çıxıb, 39 qol vurub. Azərbaycan yığmasının hücumçusu Mahir Emrelinin keçmiş komanda yoldaşı Çexiya yığmasında 24 oyunda 2 qolla yadda qalıb. O, daha öncə “Las Palmas”, “Hapoel” (Beer Şeva), AEK (Afina), “İnqolştadt”, “Nürnberq”, “Sparta” (Praqa), “Yablonets” və “Sauthempton” kimi klubların da formasını geyinib.