ÇL: “Hələlik tapşırığımızı yerinə yetirmişik”

“Atalanta”nın baş məşqçisi Can Pyero Qasperini komandasının UEFA Çempionlar Liqasının 2024/25 mövsümünün pley-off mərhələsinə yüksəlməsi ilə fəxr edir.

Komanda.az UEFA-nın mətbuat xidmətinə istinadən xəbər verir ki, italiyalı çalışdırıcı hələlik tapşırıqlarını yerinə yetirdiklərini bildirib:

“Ən yaxın potensial rəqiblərimizdən bir neçəsi yaxşı komandadır. Püşkatma qərar verəcək. Hələlik tapşırığımızı yerinə yetirmişik. Biz növbəti mərhələyə keçdik və yenidən Çempionlar Liqasının himnini eşidəcəyik. Berqamoda bu, hamı üçün fiestadır. Biz bununla fəxr edə və sevinə bilərik”.

“Atalanta” 15 xal toplayaraq Çempionlar Liqasının ümumi mərhələsini turnir cədvəlinin 9-cu pilləsində başa vurub. Bu gün pley-off mərhələsinin oyunlarının püşkatma mərasimi keçiriləcək. İtaliya komandasının mümkün rəqibləri “Brügge” və Lissabon “Sportinq”idir.