“Çempionat çox maraqlı keçir” – UNEC-in voleybolçusu

“Təcrübəli oyunçulara qarşı çıxış etmək gücümüzü artırmağa təkan verir”.

Komanda.az xəbər verir ki, bunu UNEC komandasının voleybolçusu Xədicə Hadızadə deyib.

Azərbaycan Voleybol Federasiyasının mətbuat xidmətinə açıqlama verən gənc oyunçu cari mövsümdə debüt etdiyi Yüksək Liqanı dəyərləndirib:

“Bu il ilk dəfədir ki, Yüksək Liqada çıxış edirəm. Çempionat çox maraqlı keçir. Rəqiblərimiz güclüdür, buna baxmayaraq, biz hər oyunda əlimizdən gələni edirik. Digər komandalarla müqayisədə UNEC-in heyəti daha gənc voleybolçulardan təşkil olunub. Təcrübəli oyunçulara qarşı çıxış etmək gücümüzü artırmağa təkan verir”.

UNEC Azərbaycan Yüksək Liqasında beş oyundan sonra sonuncu – altıncı pillədə qərarlaşıb. Komandanın hesabında xal yoxdur.