CIES “Qarabağ”ın hücumçusunu ilin ən yaxşıları siyahısına daxil edib

Beynəlxalq İdman Araşdırmalar Mərkəzi (CIES) Azərbaycan millisinin və “Qarabağ”ın hücumçusu Nəriman Axundzadəni 2024-cü ilin yaşı 21-dən aşağı olan ən yaxşı futbolçularının siyahısına daxil edib.

Komanda.az xəbər verir ki, bu barədə CIES-nin təqvim ili üçün hazırladığı hesabatda bildirilib.

Qurum 64 liqada 2004-cü il və daha sonra anadan olmuş oyunçularla bağlı araşdırma aparıb.

Nəriman Axundzadə sağ vingerlərə ən çox məhsuldar ötürmə verən və onlara qapıya zərbə vurmaq imkanı yaradan futbolçulardan hesab olunur. Hazırda 20 yaşı olan forvard bu göstəriciyə görə 75.1 əmsalla 7-ci pillədə qərarlaşıb.

İlk sırada Türkiyə yığmasının və “Real”ın futbolçusu Arda Gülər yer alıb. Onun əmsalı 81.4-dür.

Nəriman Axundzadə 2024/2025 mövsümündə Azərbaycan Premyer Liqasında 7, UEFA Çempionlar Liqasının təsnifat mərhələsində 2 ötürmə ilə yadda qalıb.