“Liverpul”un futbolçusu “Real”ın “radar”ında

Yarımmüdafiə mövqeyinə axtarışlarını davam etdirən “Real” istədiyi futbolçunu İngiltərədə tapıb.

Komanda.az İngiltərə mətbuatına istinadən xəbər verir ki, “Liverpul”un futbolçusu Fabinyo “kral klubu”nun transfer hədəfindədir. Madrid klubu braziliyalı futbolçu üçün “qırmızılar”a 75 milyon avroluq təklif göndərməyə hazırlaşır.

“Liverpul”un baş məşqçisi Yurgen Kloppun Fabinyonu komandada saxlamaq istəməsinə baxmayaraq, daha yüksək bir məbləğ müqabilində futbolçunun transferinə icazə veriləcəyi bildirilir.

2018-ci ildə 45 milyon avro müqabilində “Monako”dan transfer olunan 25 yaşlı futbolçunun “Liverpul”la müqaviləsi 2023-cü ilədək nəzərdə tutulub.