ÇL: “Biz hər şeyə nail olmaq istəyirik”

“İnter”in hücumçusu Lautaro Martines Çempionlar Liqasının 4-cü turunda “Arsenal”la oyunda (1:0) qazanılan qələbəni şərh edib.

Komanda.az UEFA-nın rəsmi saytına istinadən xəbər verir ki, o, komandasının çıxışından razı qaldığını bildirib:

“Bu matçın ən yaxşı tərəfi üç xal, komanda ruhu və meydanda göstərdiyimiz mübarizə əzmi idi. Daha sonra bu qarşılaşmalar çox vacib olacaq. Bir dənə də olsun qol buraxmadıq, bu da İtaliya çempionatında çox qol buraxdığımız üçün müsbət haldır. Biz xoşbəxtik. Bu turnirdə hər şey xırda amillərdən asılıdır və biz zirvəyə yüksəlməyə davam etməliyik. Biz hər şeyə nail olmaq istəyirik, klubun tarixi bunu tələb edir. Mən bacardığım hər şeyi qazanmaq istəyirəm və biz bunun üçün çalışırıq”.