“Liverpul”un Koutinyonu geri qaytardığını görmək istəyərdim” – Karrager

İngiltərənin “Liverpul” klubunun sabiq futbolçusu Cimi Karrager açıqlama verib.

Komanda.az İngiltərə mətbuatına istinadən xəbər verir ki, 41 yaşlı sabiq futbolçu, “Barselona”da çıxış edən Filippe Koutinyonu yenidən “Liverpul”da görmək istədiyini bildirib:

“Düşünürəm ki, onlar daha bir yaradıcı futbolçu transfer edə bilərlər. “Liverpul”un Koutinyonu geri qaytardığını görmək istəyərdim. Məlumdur ki, “Barselona” onun üçün yaxşı olmadı. Onun “Liverpul” üçün əla transfer olacağını düşünürəm. Bu mövqedə Adam Lallana və Xerdan Şakiri var, amma onlar Koutinyo deyillər.

Keçən mövsüm “Liverpul”un 97 xal toplamasına baxmayaraq, Premyer Liqanı “Mançester Siti” qazandı və “qırmızılar” bütün mövsüm ərzində sadəcə bir dəfə, yanvarda onlara məğlub olmuşdu. Bütün mövsümboyu sadəcə bir matçda məğlub olmaq və 97 xal toplamaq fenomenal bir uğurdur. Bunu yenidən etmək çox çətindir.

İndi hər kəs bu kluba çox inanır, onlar nə etdiklərini bilirlər. İndi hər kəs əsl “Liverpul”u hiss edir. Onlar transferlərə istədikləri qədər pul xərcləyə bilərlər. Onların yaxşı baş məşqçisi, heyəti və stadionları var. Bu, son 30 ildə “Liverpul”un olduğu ən yaxşı mövqedir”.