Qvardiola Halandı müdafiə etdi

“Mançester Siti”nin baş məşqçisi Pep Qvardiola “Mançester Yunayted”in sabiq futbolçusu Roy Kinin Erlinq Haland haqda rezonans doğuran açıqlamasına cavab verib. İrlandiyalı keçmiş futbolçu Norveç millisinin üzvünün hazırkı formada ona 2-ci liqa səviyyəsində olan oyunçunu xatırlatdığını söyləyib.

Komanda.az “City Xtra”-ya istinadən xəbər verir ki, ispaniyalı mütəxəssis Kin ilə qətiyyən razı olmadığını bildirib:

“Mən Kin ilə qətiyyən razı deyiləm. Haland hazırda dünyanın ən yaxşı hücumçusudur. O, ötən mövsüm əldə etdiyimiz hər şeyi qazanmağımıza kömək etdi”.

Haland 2022-ci ilin iyulunda “Mançester Siti”yə “Borussiya”dan (Dortmund) keçib. Onun İngiltərə klubu ilə müqaviləsi 30 iyun 2027-ci ilə qədərdir. Haland bu mövsüm bütün turnirlərdə 35 matçda 29 qol vurub və 6 məhsuldar ötürmə edib.

Norveçli forvard 2022/23 mövsümündə “şəhərlilər”ə tarixində ilk dəfə Çempionlar Liqasını qazanmağa kömək edib. O, həmçinin İngiltərə çempionu və ölkə kubokunun qalibi olub.