“Barselona” “Mançester Yunayted”in futbolçusu üçün danışıqlara başlayıb

“Barselona”nın idman direktoru Deko mümkün transferlərin müzakirəsi üçün “Mançester Yunayted”in idman direktoru Con Murto ilə görüşüb.

Komanda.az xarici KİV-ə istinadən xəbər verir ki, Xavinin cari mövsümünün sonunda gedişindən sonra yeni baş məşqçinin adı hələ məlum olmasa da, Kataloniya klubunun rəhbərliyi artıq növbəti mövsüm üçün heyəti gücləndirməyi planlaşdırır.

Görüşdə müzakirə olunan futbolçulardan biri də “Xetafe”də icarə əsasında çıxış edən hücumçu Meyson Qrinvud olub. İngilis futbolçunun “Mançester Yunayted”lə müqaviləsi 2025-ci ildə başa çatır. Ona görə də, “Barselona” onu sərfəli qiymətə ala biləcək.

Daha əvvəl Qrinvudun İngiltərə klubuna qayıtmaq istəmədiyi haqda məlumat yayılıb.

Daha əvvəl 22 yaşlı hücumçu təcavüzə cəhddə şübhəli bilinərək həbs olunub və 18 aydan çox müddət ərzində futbol oynamayıb. 2023-cü ilin fevralında polis oyunçuya qarşı cinayət işini dayandırıb.