Messi Argentina millisini “Barselona” ilə müqayisə etdi

Argentina millisinin hücumçusu Lionel Messi yığma komandanın hazırkı səviyyəsini Pep Qvardiolanın dövründə formasını geyindiyi “Barselona” ilə müqayisə edib.

Komanda.az “Ole”-yə istinadən xəbər verir ki, Messi, Argentina millisinin Qvardiolanın baş məşqçi olduğu dövrdəki “Barselona”ya bənzədiyini bildirib:

“Bu komanda təsiredicidir və böyüməyə davam edir. Komandamız getdikcə daha yaxşı oynayır. Qvardiolanın “Barselona”sı ilə müqayisədə… “Barsa” tarixinin ən yaxşı komandası idi.

Amma düşünürəm ki, bu Argentina milli komandası həmin “Barselona”ya çox yaxındır. Biz bunu Amerika kubokunu və dünya çempionatını qazanmaqla nümayiş etdirdik. Əla oyunçularımız var. Ümid edirik ki, eyni ruhda davam edəcəyik”.

Argentina millisi 2021-ci ildə 1993-cü ildən sonra ilk dəfə Amerika kubokunun qalibi olub. Bir il sonra argentinalılar 1986-cı ildən bəri ilk dəfə dünya kubokunu qazanıblar.