Azərbaycanın 5 şahmatçısı 110 min dollarlıq turnirdə iştirak edəcək

Azərbaycanın 5 şahmatçısı bu gün Qətərin paytaxtı Dohada start götürəcək beynəlxalq yarışda iştirak edəcək.

Azərbaycan Şahmat Federasiyasından Komanda.az-a verilən məlumata görə, “Qatar Open”də Vüqar Rəsulov, Əhməd Əhmədzadə, Read Səmədov, Gülnar Məmmədova və Xanım Balacayeva mübarizə aparacaq.

155 idmançının iştirak edəcəyi turnir İsveçrə sistemi üzrə keçiriləcək.

9 turdan ibarət yarışda Maqnus Karlsen (Norveç), Hikaru Nakamura (ABŞ) və Aniş Giri (Niderland) kimi tanınmış qrossmeysterlər də gücünü sınayacaq.

Yarışın mükafat fondu 110 min dollar təşkil edir.