5 milyon avro ver, “Real”ın futbolçusuna sahib ol

“Real”ın sağ cinah müdafiəçisi Alvaro Odriosola qarşıdakı transfer pəncərəsində Madrid klubunu tərk edə bilər.

Komanda.az AS nəşrinə istinadən xəbər verir ki, “kral klubu”nun rəhbərliyi futbolçunun gedişinin əleyhinə olmayacaq. Futbolçunun özü də kifayət qədər şans qazanmadığı üçün klubunu dəyişməkdə maraqlıdır. Bununla belə, Madrid klubun rəhbərliyi müdafiəçini pulsuz buraxmaq fikrində deyil. Onlar onun satışından ən azı 5 milyon avro əldə etmək niyyətindədirlər.

Odriosolanın xidmətində ən çox “Real Sosyedad”ın maraqlı olduğu bildirilir. Müdafiəçi bu klubun yetirməsidir və 2017/2018 mövsümündə komandanın əsas heyətində çıxış edib.

Odriosola bu mövsüm bütün yarışlarda “Real”ın heyətində cəmi 5 oyuna çıxıb.

Futbolçunun Madrid klubu ilə müqaviləsi 2024-cü ilin iyun ayının sonuna qədər qüvvədədir.