“Çempionlar Liqasında davam etməyə layiq deyilik” – Xavi

“Barselona”nın baş məşqçisi Xavi Çempionlar Liqasının qrup mərhələsinin 4-cü turunda “İnter”lə oyundan (3:3) danışıb.

Komanda.az xarici KİV-ə istinadən xəbər verir ki, o, ilk hissənin əla keçdiyini deyib:

“İlk hissə əla keçdi, yaxşı hücum etdik və Pedri, Qavi ilə yarımmüdafiədə yaxşı işləyərək, “İnter”i çətin vəziyyətə saldıq. İkinci hissədə çox səhv etdik. Çempionlar Liqasında səhvlər baha başa gəlir. Biz xarakterlə mübarizə aparmağa çalışdıq, amma evdə “İnter”i məğlub edə bilmirsənsə, Çempionlar Liqasında irəliləməyə layiq deyilsən. Bilirik ki, artıq taleyimiz əlimizdə deyil, Çempionlar Liqasında davam etməyə layiq deyilik. Çox az ümid var, bu səhvlər üçün yüksək qiymət ödəmək lazımdır. Mən məşqçiyəm və oyunçularım səhv etdikdə cavab verməliyəm. Biz daha çox konsentrasiya olmalı idik”.

Dörd turdan sonra “Barselona” 4 xalla turnir cədvəlinin üçüncü pilləsində qərarlaşıb. “İnter” isə 7 xalla ikinci pillədədir. Turnir cədvəlinə “Bayern” başçılıq edir (12).