Azərbaycan güləşində ilk dəfə

Azərbaycan Güləş Federasiyası bu idman növünün daha da inkişaf etdirilməsi üçün fəaliyyətini genişləndirir.

Komanda.az xəbər verir ki, federasiyanın fəaliyyət istiqamətlərindən biri də uşaq idmanının inkişafı və kütləviliyin artmasıdır.

Bu məqsədlə müstəqil güləş tariximizdə ilk dəfə U-15 Azərbaycan çempionatı keçiriləcək.

Ölkənin bütün bölgələrindən azyaşlı yeniyetmələrin cəlb olunduğu bu yarış əvvəlcə 5 zona üzrə keçirilir. Bakı (16-19 may), Lənkəran (16-17 may), Göyçay (18-19 may), Şəmkir-Gəncə (20-21 may) və Şamaxıda (22-23 may) ətraf şəhər və rayonların idmançılarının iştirakıyla zona yarışları təşkil olunur.

Bu yarışlar iyunun 7-dən 10-dək Şağan Olimpiya İdman Kompleksində baş tutacaq sərbəst və yunan-Roma güləşi üzrə ilk U-15 Azərbaycan çempionatına seçim xarakteri daşıyır. 4 gün davam edəcək çempionatın nəticələrinə əsasən, azyaşlı yeniyetmələrdən ibarət yığma komandalarımızın heyəti formalaşacaq. Daha sonra milli komandalarımız Avropa çempionatına hazırlıq məqsədilə təlim-məşq toplanışı keçəcək.

U-15 Avropa çempionatı iyulun 16-dan 19-dək Xorvatiyanın paytaxtı Zaqrebdə keçiriləcək.