“Rəqiblərin oyununa çox diqqət etmək lazım deyil” – “Liverpul”un futbolçusu

İngiltərə Premyer Liqasının növbəti turunda “Sauthempton”la qarşılaşacaq “Liverpul”un müdafiəçisi Joel Matip açıqlama verib.

Komanda.az klubun rəsmi saytına istinadən xəbər verir ki, 27 yaşlı futbolçu, bu matçda qalib gəlməyə məcbur olduqlarını deyib:

“Bu, asan oyun olmayacaq. Rəqib son oyunlarda qələbə qazana bilməsə də, “Sauthempton”un yaxşı futbolçuları olduğunu bilirik. Buna baxmayaraq, səfər oyununda nəticə əldə etməyə məcburuq”.

Matip, “Liverpul”un yenidən turnir cədvəlinin ikinci pilləsində olması haqqında da danışıb:

“Biz öz oyunumuza köklənməyə çalışırıq. Əlbəttə, digər komandaların da nəticələrinə diqqət etməli oluruq. Amma onların necə oynayacaqlarına qərar verə bilmərik. Buna görə də, rəqiblərin oyununa çox diqqət etmək lazım deyil. Biz sadəcə öz işimizə, qərar verə biləcəyimiz məsələlərə köklənməliyik”.

“Sauthempton” – “Liverpul” oyunu bu gün, saat 23:00-da start götürəcək.