“O hərəkəti etməyə məcbur idim” – Serxio Ramos

Çempionlar Liqasının 1/8 final mərhələsində “Real”ın “Ayaks”a qalib gəldiyi oyundan sonra (2:1) UEFA-nın barəsində araşdırma başlatdığı Serxio Ramos açıqlama verib.

Komanda.az İspaniya mətbuatına istinadən xəbər verir ki, oyunda bilərəkdən sarı vərəqə aldığı iddia olunan “Real”ın 32 yaşlı kapitanı, bunu qəsdən etmədiyini deyib:

“Bu deyilənlərə çox təəccübləndim. Həmin epizodda səhv etməli idim, çünki başqa çarəm  yox idi. Rəqib təhlükəli hücum edirdi. Cəzalı vəziyyətə düşəcəyimi bilmədiyimi desəm, yalan olar, amma o hərəkəti etməyə məcbur idim. Bəzən futbolda belə çətin qərarlar vermək lazım olur.

Vərəqələrimi sıfırlamaq istəsəydim, bunu qrup mərhələsində edərdim. “Roma” ilə oyunda qrupdan çıxmağı həll etmişdik”.