“Həmin oyunu da itkisiz başa vurmalıyıq” – Azərbaycan millisinin üzvü

Slovakiya ilə qarşılaşmada 4:1 hesablı qələbə qazanan futzal üzrə Azərbaycan millisinin üzvü Rafael Vilela açıqlama verib.

Komanda.az Futzal Federasiyasının rəsmi saytına istinadən xəbər verir ki, qələbə ilə bağlı fikirlərini bölüşən milli üzvü, Yunanıstanla keçiriləcək matça da toxunub:

“İzləyənlər də gördü ki, biz oyuna yaxşı başladıq. Hesabı açdıq, üstəlik fərqi artırmaq üçün epizodlar yaratdıq. Əsas problem onları qola çevirə bilməməyimiz oldu. Bu azmış kimi, rəqib qol vurdu və hesab bərabərləşdi”.

Forvard, görüşün çətin keçəcəyini gözlədiklərini də qeyd edib:

“Matçın çətin keçəcəyini gözləyirdik, belə də oldu. Əksər futzalçılarımız uzun müddət idi meydana çıxmırdı. Üstəlik, Slovakiya da qrupumuzun iddialı komandasıdır. Onlar da birinci yer uğrunda mübarizə aparırlar və Avropa çempionatının final mərhələsinə birbaşa vəsiqə qazanmağa iddialıdır”.

Qarşıya qoyulan məqsədə nail olduqları üçün sevincli olduqlarını gizlətməyən Vilela, Yunanıstana da eyni məqsədlə yollanacaqlarını vurğulayıb: 

“Əlbəttə, Slovakiya da meydanda gəzmirdi. Onlar da çalışdı bizi əks-hücumda yaxalasınlar. Müəyyən epizodlarda buna nail oldular. Yunanıstanla görüşdə isə buna imkan verməməliyik. Afinadakı matç da çətin olacaq. Rəqibimiz öz meydanında oynayır, onlar bizdən daha çox məşq ediblər, həm də ilk oyun həyəcanını üzərlərindən atıblar. Biz isə həmin oyunu da itkisiz başa vurmalıyıq. Çünki istəyimiz ardıcıl 6-cı dəfə final mərhələsində iştirak etməkdir”.