“Bu səviyyəni qorusaq, yenidən Premyer Liqanın qalibi olacağıq” – Qvardiola

“Mançester Siti”nin baş məşqçisi Pep Qvardiola komandasının 2023/2024 mövsümündəki çıxışından və ona qarşı olunan tənqidlərdən danışıb.

Komanda.az klubun rəsmi saytına istinadən xəbər verir ki, o, oyunçularına güvəndiyini və qalib gələcəklərinə inandığını bildirib:

“Səhv edə bilərəm, amma bunun arxayınçılıq olduğunu düşünmürəm. Mən oyunçuları tanıyıram. Necə qaçdığımızı və nə qədər qeyri-adi olduğumuzu bilirəm. Mənə elə gəlir ki, bu səviyyəni qorusaq, yenidən Premyer Liqanın qalibi olacağıq. Biz qalib gələcəyik.

Qari Nevill (keçmiş futbolçu) bunun nə qədər çətin olduğunu bilir. Çünki əks halda, o, “Mançester Yunayted”dəki ən yaxşı mövsümündə ardıcıl dörd Premyer Liqa qalibi olardı, lakin bacarmadı. Amma komandamın necə mübarizə apardığını, necə təzyiq göstərdiyimizi, sona qədər necə davam etdiyimizi görürəm”.

Premyer Liqada 14 turdan sonra “Mançester Siti” 30 xalla üçüncü pillədə qərarlaşıb. Çempionata “Arsenal” başçılıq edir (36 xal).