“Mbappe həqiqətən, “Real”a keçmək istəyir” – Rodriqo

“Real”ın hücumçusu Rodriqo Goes PSJ-nin forvardı Kilian Mbappenin La Liqa klubuna mümkün keçidi ilə bağlı yayılan xəbərlərə münasibət bildirib.

Komanda.az COPE-yə istinadən xəbər verir ki, o, Mbappe kimi futbolçuya ehtiyac duyduqlarını deyib:

“Mənə görə, Mbappe fenomendir. O, hazırda ən yaxşı oyunçulardan biridir. Onun kimi futbolçuya ehtiyacımız var. Mbappe həqiqətən, “Real”a keçmək istəyir. Lakin onun PSJ ilə müqaviləsi var. Məncə, o, nə qədər tez “Real”a keçsə, bir o qədər yaxşı olar. Onun keçidi baş tutmazsa, deməli, başqa oyunçular transfer edilə bilər. Qərar klub rəhbərliyi və baş məşqçi Karlo Ançelottidən asılı olacaq”.

Fransalı oyunçu 2022-ci ilin yayında azad agent kimi “kral klubu”na keçə bilərdi, amma Paris klubu onunla müqavilənin müddətini son anda uzatmışdı.

Öncədən Fransa millisinin üzvünün yayda İspaniya təmsilçisinə keçəcəyini bildirilirdi. Eyni zamanda, PSJ-nin Mbappeni satmaq üçün “Real”la əlaqə saxladığı məlum olub.

Mbappe 2022/23 mövsümündə Liqa 1 təmsilçisinin heyətində bütün turnirlər daxil olmaqla 43 oyuna çıxıb, 41 qol vurub və 10 məhsuldar ötürmə edib.